البكاء عند الاطفال الرضع

طبعا دى من اهم المشكلات اللى بتواجه كل ام
خاصة لو ام لاول مره وبتلاقى طفلها المسكين معندوش اى وسيله للتعبير عن اللى تعبه او مضيقه غير بالبكا وفى نفس الوقت انا كمان كأم معذوره لانى مش قادره افهم هو بيبكى ليه بالضبط

عشان كده انا عملت لك حبيبتى الموضوع ده لانى مريت بنفس المشكله
فى الاول كنت برتبك اول ما بنتى تبكى لانى مش عارفه مالها وايه اللى تعبها بالضبط لكن بفضل الله وهدايته انك تعرفى سبب بكاء طفلك ثم بالممارسه على الاقل بتقدرى تتغلبى على المشكله دى ولو بنسبة 80%

اسباب بكاء الطفل :
شوفى حبيبتى دى عباره عن لسته كنت بحطها فى دماغى عشان اول ما كانت بنتى بتبكى كنت بمر عليها سريعا عشان اعرف هى ليه بتبكى بالضبط
واعرف هل بكائها بكاء عرض ام مرض ؟؟
البكاء العارض يعنى حاجه عرضه زى مثلا

* ممكن تكون عايزه تغير الحفاض : ودى حاجه بضايق كل طفل وبتقلق نومه عشان كده سريعا سريعا زى ما اتفقنا نغير الحفاض المتسخ ونمسح المكان ونضف كويس جدا ونجفف المكان لابقاء الطفل نظيف وجاف ومنعا لحدوث تسلخات له (ارجعى لطريقة تغيير الحفاض بالصور فى المواضيع السابقه)ولو كان ده سبب بكاءه هتلاقيه الحمد لله بطل بكا مع التاكد من انه ملابسه نطيفه وجافه ومحصلش تسريب لها من الحفاض ، طب لو لسه مبطلش يبقى اكيد فى سبب تانى

*ممكن تكون عايزه ترضع جعانه يعنى وحضرتك مطنشه: يبقى على طول ترضعى طفلك خاصة لو ده وقت رضعته وفى نفس الوقت بلاش زى ما اتفقنا الرضاعات العشوائيه وانه كل ما يبكى تعطيه صدرك عشان يسكت وخلاص لانه ده زى ماقلنا بيسبب مغص للطفل(ارجعى لموضوع الرضاعه وطريقة الرضاعه الصحيحه والكلام عنها بالتفصيل فى المواضيع السابقه)
تقولى لا انا لسه مرضعاه وبنظم له الرضاعه وكل حاجه تمام ومع ذلك بيبكى
يبقى نشوف سبب تانى

*ممكن يكون بيبكى بسبب المغص : وده موضوع اتكلمنا عنه بالتفصيل (ارجعى له فى المواضيع السابقه ان اردت )كعلامات واسباب وعلاج وبعض التمارينات اللى ممكن تخففه عند طفلك واستعينى بالله واقراى له قران وتحلى بالصبر ما استطعت
وان شاء الله الموضوع بيختفى من عند طفلك بعد بلوغه الشهر الرابع

*ممكن يكون الجو حر وانت ملبساه تقيل او العكس:
وبالتالى هتخففى لبسه لو فى الحر تهوى الاوضه باستمرار والعكس لو فى الشتا دفيه كويس ودفى الاوضه لكن بشرط انك لا تسلطى عليه مباشرة مصدر تهويه ولا تدفئه

*ممكن يكون حس بالخوف فجاه :شليه وضميه لك وطبطى عليه ، دايما تقراى له قران وانت بتمررى بايدك على شعره ،وبلاش طبعا الاصوات العاليه والمزعجه وكمان النور العالى اوى وخصوصا انك تسلطيه عليه وهو قايم من النوم
كل دى حاجات تضايق الطفل وتزعجه وممكن تكون سبب فى بكاءه

*ممكن يكون بيبكى عشان اسنان بتطلع لسه:
وفترة طلوع الاسنان دى بتطلب منك مزيد من الصبر وبعض الوسائل اللى ممكن تخفف الالم عند طفلك (هشرحها ان شاء الله عند الكلام عن التسنين عند الاطفال)

طيب بكا المرض زى ايه
* ممكن يكون الطفل بيعانى من اسهال او امساك :
(وايضا تكلمنا عنهم بالتفصيل فى المواضيع السابقه ارجعى اليها ان اردت)

*اوممكن عنده ارتفاع فى درجة الحراره (اتكلمنا عنه ايضا فيما سبق)
وتقلبى جسمه وتشوفى ايه اللى ممكن يكون تعبه ووالله متستغربوش ممكن قرصة نمله تضايق الطفل وتخليه يبكى
يعنى شوفى جسمه وقلبيه شوفى فى حبوب او بثور حمره فى جسمه /عنده برد او زكام /تقرحات فى الفم/عنده نزله معويه يعنى اسهال مع حمى وترجيع/عنده تسلخات مكان الحفاض وتعباه ادهنى له كريم التسلخات /عنده رشح /اوممكن يكون بيعانى من التهابات الحلق او اى التهاب اخر

والخلاصه يا اجمل ام :
شوفى طفلك لو بيبكى لسبب عارض مجرد ازالة سبب البكاء هتبقى الامور تمام ان شاء الله
ولو لا قدر الله مريض اتعملى معاه حسب النصايح اللى ذكرناها فى المواضيع السابقه وباستعمال الوسائل الطبيعيه ما استطعت وان لم يحدث تحسن لطفلك يبقى لازم تكشفى عليه ضرورى جدااااا وتابعى حالته مع الدكتور وتلتزمى بجرعات الادويه وبمقدرها المعين ولا تعطى لطفلك اى ادويه من نفسك او بناءا على تجربة احد


واعرفى ان توترك وضيقك وعصبيتك بينعكس على نفسية طفلك ومتقوليش انه لسه بيبى مش فاهم حاجه
الطفل بيحس بك من اول ما كان لسه جنين فى بطنك وبينعكس فرحك وحزنك عليه
لكن تقريبا مفيش ام الا وبتتعصب على طفلها لانها كمان بشر وفى اول تجربه لها وبتفتقد كمان للخبره والممارسه فى التعامل مع طفلها ومعرفة سبب بكاءه بالاضافه للتعب والسهر والارق اللى بتعانى منه وآلام ما بعد الولاده
انا مش بقول ده كمبرر لك انك تتعصبى على طفلك ولكن لانى مريت بده وعارفه اد ايه التعب والسهر والارق والخوف من خوض اى تجربه جديده
لا دا بدا ياكل وخايفه عليه يشرق لا دا بدا يزحف وخايفه عليه يقع يتخبط يتعور
لا بدا يكبر وبيتعفرت ويكسر و و و
او لو كمان اتعرضتى لموقف كان بيموت فيه بين ايديك
او مريض وبتلفى به على المستشفيات
(اسال الله ان يشفى كل مريض مسلم وان يحفظ اولاد المسلمين من كل سوء ومكروه)
فاكيد كل ده بيتعب اعصابك
وكله ده انا مريت به وعارفه احساسك كويس
لكن ده مش مبرر لعصبيتنا عليهم ابدااااا
ولازم دايما نحس بتانيب الضمير لو اتعصبنا عليهم
ويكون دافع لنا اننا نحسن طريقة تعاملنا معاهم فى المره القادمه
وتعرفى دايما ان مفيش ام كامله او مثاليه
بقدر مافى ام ناجحه بتتعلم من اخطاءها
وحتى لا اطيل عليكم
الصبرررر
الاستعانه بالله والالحاح عليه بالدعاء واحتساب اجر التعب والنصب منه سبحانه
تانيب الضمير ان اخطات والتعلم من اخطاءك
القراءه والاطلاع دائما لكل مايخص العنايه بطفلك وتربيته النفسيه والجسديه
الاستفاده من تجارب الامهات الناجحه ممن سبقوك
عدم التعامل مع طفلك معاملة الند للند
هو طريقك لتكونى ام ناجحه بفضل الله


منقول