فخوره بنقابى عضو نشيط
عدد المشاركات : 131 عدد المواضيع : 189 تاريخ التسجيل : 18/07/2011
| موضوع: عايزه توفرى فى كل حاجه تعالى شويه نصائح للتوفير لاصحاب الدخل المحدود الخميس سبتمبر 29, 2011 10:40 am | |
| انا هحاول اقولكو حلول وطرق نوفر بيها في كل حاجه الاكل اللبس الوقت الكهربا الميا طب وليه لا كل حاجه هنوفر فيها احنا اولي بيها هنبدا بمصروف البيت هنمشيه ازاي اليك هذه النصائح 1_هنقسم مصروف البيت بالطريقه اللي تريحك يااما بالاسابيع تقسميهم علي 4 اسابيع او 3 عشرات او الطريقه اللي انا بفضلها انك تجيبي ورقه وقلم وتكتبي كل احتياجاتك الشهريه لحوم فراخ اسماك اجبان بقاله حبوب خضار فاكهه تموين فطار وعشا لبن كده حددنا احتياجتنا هتشوفي بتحتاجي كميات اد ايه في الشهر وتنزلي تجيبيها كلها تفرزي اللحوم وتجيبي الحبوب والبقاله والخضار اللي ينفه بالشهر جبيه واللي مينفعش هتسيبي فلوسه علي جمب وكل اسبوع تنزلي السوق تجيبي احتياجاتك ولو فضل حاجه من المصروف قسميها علي عدد الاسابيع ودول لاي حجه طائه او حاجه نسيتيها 2_الصدقه اول حاجه هتعمليه في التقسيمه بتاعتك عشان ربنا يباركلك في مالك ودي طبعا حسب المصروف بتاعك وحسب امكانياتك
ثانيا التوفير في الاكل
هنعمل ايه قسمنا مصروف البيت وجبنا احتياجتنا طب ايه رايك تعملي كل حاجه في البيت يعني انا اول كل شهر بعمل ايه بجيب الطلبات وابدا احضر عجينه طعميه تكفي الشهر وادمس فول للشهر واعمل برطمانين مربي وبرطمان كبير مخللات واتعلمت من المنتدي اللانشون والجبنه القريش واجيب كرتونه بيض وبطاطس وكده عملت فطار وعشا للشهر كله بالنسبه للمسليات
طبعا داخلنا الاجازه والصيف عايزين نسهر وايه المشكله اسهري براحتك ممكن نعمل فشار في البيت بطاطس شيبسي اي نوع عصائر فريش وبلاش البيبسي بيضيع الصحه والفلوس
هنكلم بقي علي حاجه تانيه التوفير في المشتروات 1_استغني عن اي حاجه ملهاش لازمه 2_رتبي مشترواتك الاهم فالمهم 3_اجلي مايمكن تاجيله ممكن في وقت تاني تكتشفي انه ملهوش لازمه 4_قبل متخرجي تبقي عارفه هتشتري ايه وتخدي فلوسك علي ادها عشان عينك متزوغش علي حاجه تانيه 5_اشتري الخضار في اوقات متاخره بتبقي الحاجه رخيصه وتعرفي تنقي براحتك
هنكلم في نقطه هامه برضه مصروف الاولاد طب احنا ماشاء الله شاطرين وعملنا كل حاجه فالبيت طب الاولاد هل هيتفهمو ده يبقي ده واجبنا من الاول هنعمل معاهم ايه؟ 1_لازم تعلمي ولادك القناعه من صغرهم يعني عوديهم علي اكل البيت لانهم لو اتعودو يجيبو من بره انتي اللي هتعاني وتيجي تشتكي من سوء صحتهم والفلوس اللي بتضيع في كلام فاضي 2_دربي ولادك علي الاستغناء يعني برضه الاهم فالمهم هتقوليلي يفهمو ازاي انا مثلا مع ابني لما كان يطلب حاجه مثلا عايز شيبسي وشيكولاته اقوله ايه المهم دلوقتي يقولي الشيكولاته اقوله يبقي شيكولاته بكره اجيبلك شيبسي لحد متعود علي كده ميطلبش غير حاجه واحده بس حتي لو كانت رخيصه المهم انها واحده 3_في المدرسه اعمليلهم ساندوتشات مالبيت وبلاش نهائي الاكل اللي بيجيبوه مالمدرسه وممكن تحضري فطائر او بيتزا في الفريزر وتديهالهم كنوع من التغيير 4_علميهم الادخار يعني تجيبي لكل واحد حصاله يحط فيها جزء من المصروف وتكافئيه بيها فالاخر بس علي طريقتك يعني تجيبي اللي انتي شايفاهم محتاجينه يعني لبس العيد شوز جديده او ممكن لعبه مفيده 5_ابعدي كل البعد عن التقليد والمقارنه بين الاولاد واقاربهم يعني مش معني ان ابن اخويا لابس ماركات يبقي ولادي زيهم كفايه انه يكون حاجه شيك وقيمه وتناسب دخلك لانهم لو اتعودو عالتقليد هينصب عليكي في النهايه 6_علمي ولادك قيمه الشيء اللي بيلعبو بيه يعني جبتلهم لعبه حسسيه انها غاليه وانه لازم يحافظ عليها وانه يلعب بيها بدون تخريب 7_بالنسبه للاولاد الصغار منصحش ابدا باللعب الغاليه لانها غاليه او رخيصه هتخرب يبقي من الاول اي لعبه ترضيه
التوفير في الملابس احنا طبعا داخلين عالعيد وبعدين المدارس وعايزه لبس ليكي ولاولادك وجوزك الغلبان طب هنعمل ايه الحكايه بسيطه جدا انتي هتنزلي اليومين دول زي الشاطره تشوفي لبس العيد الاسعار مهاوده وسهل الفصال انما في الموسم ولا كلمه طبعا اللبس حسب امكانياتك يعني في اللي متقدرش غير ب100 جنيه وفي اللي 200 وفي 500 انتي هتجيبي حسب امكانياتك يعني انا عن نفسي مبفضلش ابدا لبس الاطفال الغالي لانهم مش مقدرين قيمته كمان ممكن تستغلي حاجات موجوده عندك يعني جاكت جاي هديه لابنك ممكن تجيبيله بنطلون او حتي تفصليه ويبقي طقم العيد فستان هديه لبنوتك كملي الطقم ومشي الليله بالنسبه للبس البيت لاولادك برضه حسب امكانياتك يعني والله في حاجات رخيصه وقطن وشيك جدا بس اختاري المكان المناسب يعني في اماكن بتبيع لبس بسعر تحفه وابعدي عن المولات الحاجه غاليه جدا بالنسبه بقي للبس ليكي انتي طبعا اللبس الحريمي نار حتي لو جبتي عبايه عشان تبقي حاجه شيك مش اقل من 500 طب انا هقولك بعمل ايه بنزل الف لفه عالمحلات بتاعه العبايات واشوف موديل شيك واصوره واعرف القماشه كويس وانزل لفه تانيه علي محلات القماش اشتري نفس القماشه واوديها لخياطه او ترزي شاطر ينفذلك الموديل وفي الاخر العبايه ام 500 وقفت عليكي مكملتش 150 نيجي بقي للبس المدارس خليكي ذكيه انتي طلعي اللبس القديم وشوفي اللي هينفع منه يعني ممكن تلاقي جيبه حالتها كويسه او بنطلون لسه نضيف ايه المشكله انك تستخدميه وتكملي الباقي جديد ومش هيكلفك كتير
التوفير في المنظفات 1_استعملي مسحوق غسيل يكون بسعر معقول زي بونكس او لانج وعشان النضافه تكون تمام اتبعي الاتي طبعا مش هنملي الغساله جامد للحصول علي النضافه المرغوبه لو كانت غسالتك من النوع اللي مبتملاش كويس ممكن تزوديلها ميه من درج المسحوق اذا كانت الملابس شديده الاتساخ ممكن نقعها من بالليل وتصحي تكملي الغسيل بالنسبه للملابس البيضاء لازم النقع في ماء ساخن ومسحوق وشويه كلور صغيرين عشان ميهريش الهدوم 2_بالنسبه لسائل الاطباق سهل اوي عمله في البيت هتجيبي وجبه صابون من محل المنظفات ب5 جنيه تقعد معاكي حوالي 3 شهور 3_باقي المنظفات هنعمل فيها ايه صابون الوجه في انواع كتير جدا باسعار معقوله اختاري اللي يناسبك استبدلي المطهرات زي الديتول بالفنيك او الكلور استبدلي ملمع الزجاج بالماء المضاف ليه الخل ملمع الموبليا في واصف هايله من المنتدي هتضيفي بعض قطرات الزيت وزيها خل وتلمعي الموبليا وتشيلي اثار الزيت بقماشه نضيفه هنستبدل بطه التواليت بمسحوق غسيل عادي مضاف ليه خل وفنيك ومايه ورشي الحمام واغسلي بالفرشه وشوفي البياض واللمعان وكمان مطهر
طرق للتوفير تزودي بيها اللحمه المفرومه
اللحمه المفرومه انا بعتبرها من الحاجات الموفره جدا يعني ممكن تعملي كده
1_هتعصجي نص كيلو مفروم مع بصلتين وطماطمتين وممكن جزرايه مبشوره وقرن فلفل حامي وظبطي الملح والبهارات وشوفي الكميه تعمل 3 صواني
2_هتجيبي ربع لحمه مفرومه وبصلايه ناعمه ورغيفين فينو مبلولين ومعصورين وبيضه واخلطيهم ببعض والملح والبهارات واقليها بالبيض والبقسماط تعمل 25 صباع
3_ضيفي للحمه المفرومه فول صويا مدشوش وتنقعيه كويس والبصل والبهارات واعملي كفته مشويه
4_ضيفي للحمه بصل كتير وطماطم مقطعه وفول صويا منقوع واعملي احلي حواوشي
5_هنضيف واحده بطاطس نيه وبصلايه وقرن فلفل وفصين توم واعملي احلي برجر بيتي صحي ونضيف
6_افرمي القوانص بتاعه الفراخ وضيفيها للحمه هتكترها ومش هتفرق في الطعم نهائي
7_قطعي قطع اللحم صغير جدا وضيفي طماطم كتير وفلفل اخضر وبصلايه والبهارات وكبايه زبادي واعملي احلي شاورما
بواقي الاكل طبعا احنا بقينا اساتذه في التوفير طب بتعملي ايه في بواقي الاكل اوعي تكوني بترميها دي بتنفع جدا شوفي ازاي بواقي الرز تطحن في الكبه وتعجن ببيضه ونعملها زي الكبيبه محشيه لحمه مفرومه ونقليها بالزيت بواقي الخضار نحطها في الفريزر وتنفع في يوم تاني وممكن تطلعيها لولادك في اي وقت بواقي اللحم تقطع قطع صغيره ونعملها شاورما بواقي الدجاج تقطع واما نعملها شاورما ونحشي بيها الكريب او نعمل منها صينيه مكرونه نجرسكو بواقي العيش نحمصها ونعملها بقسماط او تقطع وتدهن بالزيت وفصين توم واي بهار وتحمص في الفرن احلي من بيك رولز بواقي السمك نفرمها ونعجنها بحبه بطاطس ونصبعها ونقليها بالبيض والبقسماط بواقي الجمبري يقشر ونحمره مع بصل وفلفل وزيتون شرائح ونحط عليه مكرونه مسلوقه تحفه
اكلات المطاعم طبعا كلنا من عشان الاكل من بره انا بقي عامله اكتفاء زاتي مبشتريش حاجه من بره نهائي واللي هتقول اسله اسهل منتي ممكن تجهزي اكلات كتير في الفريزر وعايزه تتعشي يوم اكل جاهز هتطلعيه عالتسويه علي طول طب هنعمل ايه في البيت دي طرق لبعض الاكلات الجاهزه وصفه مكرونه تحفه (بنالا كريم) مكرونه اقلام مسلوقه حسب العدد فراخ مخليه مقطعه صغير فلفل اخضر زيتون ترانشات بصل صلصه بشاميل خفيف يبقي زي الكريمه جبنه رومي مبشوره الطريقه نشوح البصل في حته زبده صغيره نضيف الفلفل وشرائح الفراخ نضيف الزيتون نقلب فيهم لحد مالفراخ تستوي وممكن نحط شويه ميه صغيرين نضيف ملح وفلفل نقلب عليهم المكرونه ونحط صوص البشاميل يبقي كتير مغطي المكرونه كلها نحطه في صينيه ونغطيها بالجبن الرومي تحت الشوايه 3 دقايق الجبنه تسيح تغرف في اطباق وبالهنا والشفا
انا هقولكم طريقه لعمل دجاج كنتاكي روعه بصي ياستي احنا هنسلق الفراخ نص سلقه وهنكون مقطعينها 8 وبعدين نحطها في دقيق ابيض او دره وبعدين في البيض واللبن وبعدين نغطيها بالخلطه السحريه اللي هي ايه؟اكتبي معايا 1 كورن فليكس مطحون نص طحنه 2 بقسماط مطحون 3 كيس فيجيتار حار 4 مكعب مرقه 5 حبهان مطحون لو موجود خلاص غطيناها حطيها بقه بالفريزر نص ساعه وطلعيها واقليها في زيت غزير وسخن والله دي احلي وصفه لدجاج كنتاكي بجد روعه جربوها وقولولي
بصو ياقمرات انا هقولكم طريقه للبرجر زي بتاع ماكدونالدز بالظبط وجربوه وهتدعولي المقادير نص كيلو لحمه مفرومه 2 ثمره بطاطس كبيره نيه 1 قرن فلفل بارد او حار 1 بصله 2 فص توم ملح وفلفل وبهارات
الطريقه نقطع البطاطس كل واحده قطع صغيره تفرم جميع المكونات في الكبه او مفرمه اللحم تقطع كور صغيره تشكل علي شكل اقراص ممكن بغطا برطمان كبير ترص الاقراص في كبق فلين وبين كل طبقه وطبقه كيس توضع في الفريزر وتخرج عند الحاجه
طبعا كلنا بنموت في الاندومي بس طبعا مش صحيه وفيها مواد حافظه هنعمل ايه نستسلم لالالالالالالالالاالفتوكات ميستسلموش امال ايه يفكرو هنجيب شعريه طويله من عند بتوع الحبوب هنسلقها تلت اربع سوا ونغسلها عشان النشاونحط ميه عالنار فيها مرقه دجاج او لحم اواي بهارات وننزل الشعريه المغسوله ونسيبها تغلي غلوه ونطفي عليها والف هنا وشفا
شويه اكلات بقي موفره (لحوم) فراخ بانيه ومكرونه وبطاطس بطاطس محشيه لحمه مفرومه ورز وسلطه مسقعه باللحمه المفرومه وبطاطس بفتيك ومكرونه وسلطه وبطاطس صينيه مكرونه بالبشاميل وكفته بانيه وسلطه فراخ وبطاطس ورز اي نوع خضار ولحمه ورز وسلطه سمك ورز وسلطه كوسه باللحمه المفرومه ورز وسلطه كفته بانيه وبطاطس وسلطه سندوتشات شاورما وبطاطس حواوشي مكرونه نجرسكو وبطاطس وسلطه صينيه جلاش بحشوه البيتزا وبفتيك كبده مقليه وبطاطس وسلطه كفته رز ورز وسلطه كبيبه بالبرغل ورز بالخلطه ودي اكلات بدون لحوم مسقعه وبطاطس قرنبيط وسلطه كوسه بالبشاميل ورز وسلطه محشي ورق عنب وسلطه زبادي ولسان العصفور محشي باذنجان وكوسه وملوخيه وسلطه جلاش بحشوه البيتزا وبطاطس محمره مكرونه بالتونه وبطاطس بيتزا كشري مصري او اسكندراني وسلطه عجه وبطاطس وسلطه طاجن فول بالشكشوكه وسلطه كفته بطاطس وسلطه صينيه بطاطس ورز معمر رز معمر بالكبد والقوانص وسلطه ملوخيه وفلفل مقلي وباذنجان محشي فلفل
طرق عمل الصلصات في البيت انا الصلصات اللي بحبها الكاتشب والمايونيز والطحينه طريقه عمل الكاتشب
المكونات
5 حبات طماطم 8 فصوص ثوم بصله متوسطه 1\4 كوب خل 3 ملاعق سكر 1 ملعقه ملح
الطريقه
تقطعى الطماطم مكعبات والبصل حلقات صغيره والثوم ايضا وتضعيهم فى اناء على نار هادئه وتتركيهم حتى تطرى المكونات وبعدين تصفيهم من بزر الطماطم وبعد كده تضعى عليهم الخل والسكر والملح وتقلبى حتى يصبح الخليط سميك وبعد كده تسيبه يبرد ودخليه التلاجه طريقه عمل المايونيز بيضه نص كوب زيت معلقه صغيره خل نص ليمونه نص معلقه ملح نص معلقه سكر الطريقه نضرب البيضه في الخلاط كويس اوي هنفتح فتحه الخلاط من فوق ونضيف الزيت بالراحه نقطه نقطه ونضرب كويس لحد ميتقل معانا نضيف باقي المكونات ونضرب ونفضيه في برطمان ونقفله ونحطه فالتلاجه طريقه عمل الطحينه كوب سمسم مطحون كوب دقيق كوب زيت الطريقه نضيف المكونات علي بعضها ونقلب بالشوكه انا بقي بفضل ايه هنطحن السمسم ونضيف الدقيق والزيت نضيفه عند الاستخدام لانه مع الوقت طعمها بيغير
بصي ياقمر عجينه الطعميه كيلو فول مدشوش حزمتين كرات كام عود بقدونس علي شبت علي كسبره 3 بصلات نص راس توم الطريقه ننقع الفول 12 ساعه وبعدين نصفيه ونضربه في الكبه مع باقي المكونات او المفرمه نضيف ملح وكمون وشطه ونص باكو بيكنج باودر هتعبيه في اكياس في الفريزر طريقه تدميس الفول هننقع الفول 12 ساعه هنضيف كبشه عدس اصفر وطماطمايه مقطعه ونحطه في الدماسه وتكون الميه مغطياه والفول يكون نص الدماسه لانه بيكبر واول ميغلي وطي النار جدا وسبيه ساعتين ونص وكل شويه تابعيه لو احتاج ميه تزوديله ميه مغليه طريقه عمل اللانشون 3 بيض 3 فص توم 3 معلقه دقيق 3 معلقه زيت 3 قطع جبنه مثلثات 3 فص حبهان ثمره بنجر مفروم او لون صناعي 2 مكعب مرقه نضرب المكونات كلها في الخلاط هتبقي شبه العصير وممكن نضيف زيتون مقطع هنجيب كوب استانلس ندهنه زيت ونضيف الخليط ونحط الكوب في حله بها ماء مغلي ونسيبها نص ساعه او اكتر لحد ميجمد وبعدين سبيه يبرد خالص وطلعيه بحرف السكينه حطيه في التلاجه يبرد وبعدين طلعيه قطعيه ترانشات طريقه الجبنه القريش هنغلي اللبن ونسيبه لحد ميبقي دافي نولع الفرن ونحط طاجن فخار فاضي لمده ربع ساعه طلعي الطاجن وهو سخن حطي فيه اللبن وعليه رشه ملح وغطيه بفوطه وحطيه في الفرن وهو مطفي بس سخن سبيه يوم او يومين وبصي عليه اول ميقطع ويعمل جبنه فضيه في مصفه عليها حته شاشه وسبيها للصبح تنزل ميتها بس كده حطيها بقي في التلاجه
طرق لاستغلال الدجاج تجيبي الفرخه كبيره 2.5 كيلو وتقسميها علي مرتين لو 4 افراد والله بتبقي مش صغيره مع خضار ورز او بالبطاطس وبتبقي تحفه كمان شيلي جناحات الدجاج وحوشيهم واعمليهم اكله فالشهر في صينيه بطاطس كمان الكبد والقوانص هتحوشيهم القوانص هتعملي بيها رز بالخلطه الكبده بقي هتعملي بيها ايه تفرديها كويس بسكينه حاميه وتتبليها بتوم وملح وكموت وتقليها بالرده وتدوسي عليها عشان تتفرد كويس بتبقي تحفه ومحدش يفرقها عن البلدي غير طبعا البانيه اللي هتقطعيه من الصدور منقوول للفائدة [ندعوك للتسجيل في المنتدى أو التعريف بنفسك لمعاينة هذه الصورة] | |
|
فخوره بنقابى عضو نشيط
عدد المشاركات : 131 عدد المواضيع : 189 تاريخ التسجيل : 18/07/2011
| موضوع: رد: عايزه توفرى فى كل حاجه تعالى شويه نصائح للتوفير لاصحاب الدخل المحدود الثلاثاء ديسمبر 27, 2011 4:26 am | |
| | |
|